शेवटच्या ३० मिनिटांत वातावरण फिरलं! सेन्सेक्स-निफ्टीमध्ये उसळी; टाटा, पॉवर ग्रिडच्या शेअर्सची 'दिवाळी'

Stock Market : अर्थसंकल्पाच्या दिवशी शेअर बाजारात २४०० अंकाची घसरण झाली होती. मात्र, आज बाजाराने चांगले पुनरागमन केलं आहे.

Stock Market : अर्थसंकल्पाच्या दिवशी झालेल्या प्रचंड पडझडीनंतर, आठवड्याच्या पहिल्याच दिवशी शेअर बाजाराने फिनिक्स पक्षाप्रमाणे भरारी घेतली आहे. सुरुवातीच्या सत्रात असलेल्या अस्थिरतेनंतर गुंतवणूकदारांनी दाखवलेल्या विश्वासामुळे बाजाराने दिवसाच्या उच्चांकी पातळीवर बंद होत दमदार पुनरागमन केले. सेन्सेक्स ९४४ अंकांनी वधारून ८१,६६७ वर, तर निफ्टी २६३ अंकांच्या तेजीसह २५,०८८ वर स्थिरावला. विशेष म्हणजे, आयटी क्षेत्र वगळता इतर सर्वच क्षेत्रांत सोमवारी मोठी खरेदी पाहायला मिळाली.

सोमवारी बाजार अचानक का सावरला?१. 'व्हॅल्यू बायिंग'ची संधीबजेटनंतरच्या घसरणीमुळे अनेक दर्जेदार शेअर्स स्वस्त भावात उपलब्ध झाले होते. गुंतवणूकदारांनी या घसरणीला भीती म्हणून न पाहता 'संधी' म्हणून पाहिले आणि पॉवर ग्रिड, टाटा मोटर्स यांसारख्या शेअर्समध्ये जोरदार खरेदी केली.

२. कच्च्या तेलाच्या किमतीत मोठी घसरणजागतिक बाजारात ब्रेंट क्रूडचे भाव ४.१४ टक्क्यांनी कोसळून ६६.४५ डॉलर प्रति बॅरलवर आले. भारत हा तेल आयात करणारा मोठा देश असल्याने कच्चे तेल स्वस्त होणे हे महागाई कमी करण्यासाठी आणि अर्थव्यवस्थेसाठी सकारात्मक मानले जाते. यामुळे इक्विटी मार्केटला मोठा आधार मिळाला.

३. अर्थसंकल्पातील 'लॉन्ग टर्म' व्हिजनगुंतवणूकदारांना आता अर्थसंकल्पातील दीर्घकालीन सकारात्मक पैलू समजू लागले आहेत. ५३.५ लाख कोटींच्या या बजेटमध्ये मॅन्युफॅक्चरिंग, डेटा सेंटर्स, सेमीकंडक्टर आणि पायाभूत सुविधांवरील खर्चावर दिलेला भर बाजाराला भविष्यातील वाढीची शाश्वती देणारा ठरला आहे.

४. रुपयाची 'दौड' कायमकच्च्या तेलाच्या किमती कमी झाल्याचा फायदा भारतीय रुपयालाही झाला. डॉलरच्या तुलनेत रुपया ३७ पैशांनी मजबूत होऊन ९१.५६ वर बंद झाला. रुपयातील या मजबुतीमुळे विदेशी गुंतवणूकदारांचा आत्मविश्वास वाढण्यास मदत झाली.

तज्ज्ञ काय म्हणतात?एसबीआय सिक्युरिटीजच्या एमडी आणि सीईओ भुवनेश्वरी ए. यांच्या मते, "हा अर्थसंकल्प विकास आणि स्थैर्य यांचा सुवर्णमध्य आहे. राजकोषीय तूट ४.४ टक्क्यांवरून ४.३ टक्क्यांपर्यंत खाली आणण्याचे लक्ष्य गुंतवणूकदारांना दिलासा देणारे आहे. तसेच, 'फ्युचर्स अँड ऑप्शन्स'मधील करातील वाढ ही सट्टेबाजीला आळा घालून रोख बाजारातील सहभाग वाढवण्यासाठी उचललेले योग्य पाऊल आहे."

वाचा - चाळीशीत आहात? मग 'या' ७ चुका टाळा! निवृत्तीनंतरच्या सुखी आयुष्यासाठी आजच लावा आर्थिक 'फिल्डिंग'

तांत्रिक विश्लेषणएचडीएफसी सिक्युरिटीजचे देवर्ष वकील यांच्या मते, निफ्टीने २५ हजार पार केले असले तरी तो अजूनही २००-डे ईएमएच्या खाली आहे. जोपर्यंत बाजार या स्तराच्या वर सातत्याने टिकत नाही, तोपर्यंत सावध राहणे गरजेचे आहे. निफ्टीसाठी आता २५,१५० हा अडथळा असून २४,५७१ ही महत्त्वाची आधारभूत पातळी असेल.